2013 var Språkåret. Det var heilt naturleg for Møre-Nytt å satse tungt på dette. Det skjedde frå starten med Nynorskstafetten, og heldt fram med Dei nynorske festspela i juni og feiringa av Ivar Aasen sin 200-årsdag i august.
Møre-Nytt skal ikkje berre satse på dei store hendingane, men vere til stades i lokalsamfunnet. Det er ein ambisjon å dekkje alle bygdelag. Det er krevjande, for avstandane kan av og til vere ”for lange” når deadline nærmar seg. Men i løpet av året vart alle bygdelag dekt. For Møre-Nytt er det viktigare å dekkje den lokale kulturproduksjonen, enn nødvendigvis dekkje konsertar og framsyningar med kjende artistar frå hovudstadsmiljøet.
Siger: Erling Vole jublar for det avgjerande målet for Vartdal. (Foto: Joachim Kroken Åsebø)
Ørsta kommune, og også Volda kommune, er i økonomiske vanskar. Møre-Nytt har vore tett på, og ikkje minst prøvd å synleggjere konsekvensane for innbyggjarane med innføring av eigedomsskatt, reduksjon i tilbod osb.
Diverre vart 2013 også eit år der naturkreftene viste seg frå ei ublid side. I november kom det eit styrtregn som medførte fleire jordras. Det mest alvorlege hende på Vartdal, der hus vart øydelagde, og familiar vart evakuerte. Her hadde Møre-Nytt ei fyldig dekning både på nett og papir etter ulykka.
2013 var eit valår, og sjølv om det ikkje var eit lokalval, som ofte gjev større engasjement, prega valkampen spaltene. For Møre-Nytt handlar det om å synleggjere viktige saker for lokalsamfunnet, og få partia og kandidatane sine synspunkt på desse. I tillegg vart det mange innlegg i debattspaltene.
Også næringsutviklinga i kommunen vart følgt tett. Ørstaog Volda er samfun i omstilling, der industriarbeidsplassane vert redusert, offentlege arbeidsplassar er under press, og talet på handelsbedrifter aukar. I tillegg vert det satsa på reiseliv, oppdrett og kulturproduksjon – og samferdselspolitikken med moglege nye vegar, vil påverke dagleglivet.
Dramatisk: Det var uhyggjeleg då jordraset slo inn i husa i Årsetdalen på Vartdal. (Foto: Janne-Marit M. Falch)