Vi skal formidle det viktigaste som skjer i det offentlege rom, pluss at vi skal la folk som har meiningar om samfunnsutvikling få sleppe til. Vi skal skape engasjement og begeistring, og formidle ein levande debatt om korleis våre lokalsamfunn skal vere og utvikle seg.

• I 2013 var stortingsvalet ei viktig sak som prega vår dekning

• Endringar i næringsstruktur og næringsliv i regionen har vore viktige saker i 2013. Mange bedrifter er inne i omstillingsfasar, og det har ført til mange nye bedrifter samstundes som tradisjonelle bedrifter har blitt lagt ned. Mange kommunar slit med dårleg kommuneøkonomi på grunn av auka kostnader, og auka krav til kvalitet på offentlege tenester og offentlege tilbod. Det har ført til stort folkeleg engasjement og debatt i spaltane både på nett og print.

• Organisering av helsevesenet i samband med nedbygging av Nordfjord sjukehus har også dette året vore sentral. Det same har debatten rundt kvaliteten på alle typer helsetenester vore.

• Nedlegging av tollkontor, stasjonering av redningsskøyta, om den skal ha base i Måløy elller Florø, endring av politidistrikt og lensmannskontor har vore mykje omtalt både på nett og papir.

• Samferdsle med trygge og gode vegar, og gode offentlige kommunikasjonar både på sjø og land har også vore sentrale tema. I 2013 kom det første vedtaket om at verdas første skipstunnel, Stad skipstunnel, skal byggjast. Den blir bygd i vårt dekningsområde.

• Det har også vore mykje debatt om kvar stamvegen nord-sør, E 39, skal gå – skal den gå i indre eller midtre Nordfjord. I vårt område har kystvegen og styrking av 45-minuttarsregionen vore viktige saker.

  Det har også vore mykje debatt om ferjetilbod og bussruter.

• I 2013 var det stor debatt om dei vidaregåande skulane i fylket. I vårt dekningsområde er det to slike skular. Spørsmålet er om kor mange skular det skulle vere i fylket og kva linjer dei ulike skulane skal ha. Denne saka skapte stor engasjement i året som har gått i heile fylket og i våre spaltar.

• Striden om kvar den nye kraftlinja skal gå gjennom fylket har ført til stort engasjement. Spesielt i Bremanger og i Ålfoten. Her har grunneigarane vore sterkt usamde, og det var to rettssaker som følgje av striden.

• Dessverre har det vore fleire alvorlege og tragiske ulukker i vårt dekningsområde dette året både på vegen, på havet og i brann der folk har mista livet. Det har også vore mange ulukker der folk har blitt skadde.

• Vi er tett på og dekker det meste som skjer av det rike kulturlivet, sport og idrett som er i regionen. Vi er på mange arrangement, og store deler av våre spaltar både på papir og nett er fylt med denne type saker. Mange barn og unge brukar mykje av fritida si på dette.

  

Vi har hatt interne kurs. Vi evaluerer kontinuerleg vårt eige produkt, vinkling og val av kjelder. Vi har sterkt fokus på val og bruk av kjelder vi brukar og vinkel på sakene.

Vi har hatt stort fokus på at papir og nett skal bli ulike og unike, og at dei to plattformene kan utfylle kvarandre og ikkje konkurrere med kvarandre.

• I 2013 har vi jobba vidare med eit intert prosjekt «Snøhetta» som vi starta i 2012. Her involverte vi heile mediehuset med alle avdelingar. Inspirert av Lars Monsen og dei med funksjonshemmingar som klarte meisterstykket å jobbe saman som team og støtte kvarandre til toppen av Snøhetta, så har vi gjennom ulike prosjekt jobba med korleis vi som team skal sette oss mål og korleis vi skal nå dei. Kva ruter skal vi velje, korleis kan vi endre rutene vi vi brukar dersom det kjem hindringar i vegen. Vi har hatt fokus på korleis vi skal nå målet vi har sett oss.

• Etikk Vi har stort fokus på å følgje Vær Varsam-plakaten. Fordi vi ikkje har noko godt system eller ressursar til å overvake nettdebattar så har vi dessverre stengt debattar og kommentarar til redaksjonelle saker på nett.
• I 2013 vart vi dømd for brot på god presseskikk i Pressens faglege Utval (PFU). Vi vart dømd for å ha publisert eit lesarbrev der det var framsett påstandar mot administrerande direktør i Helse Førde. Det var styreleiaren i føretaket som klaga oss inn for utvalet. PFU meinte at den administrerande direktøren skulle fått svart på påstandane i same avis. To andre aviser i Nordfjord, som også publiserte lesarbrevet, vart også dømde.
• Erling Wåge
• ansvarleg redaktør